zurück

Dr Borstendorfer Tudngraber

Ihr kennt'n alle un war ne noch net kennt, werd über kurz oder lang Bekanntschaft mit ne machn. Ich maan ne Schwoj Lothar, unnern Tudngraber.
War ne schu lange kennt von de Gaststättn haar, waaß, daß es e ganz lustiger, hilfsbereiter un guter Kerl is. När mit dr Sauferei is‘r noch net fartig worn, trotz guter Vorsätz. Un wenn mer egal in de Kneip gieht, warn de Pfeng alle. Das war schu meitog esu!

Seit Gahrn giet'r ne Bürgermäster offn Wecker. Er brauch enne neie Bud offn Friedhof wu er sei Warkzeig neistelln kännt un wenns mol regn tut, daß'r sich unnerstelln kaa! Off amol wars dies Gahr im Herbst esu weit: dr Schwoj Lothar kriegt senn Bungalow offn Friedhof. Im Rohbau is dar schu fartig un de Leit sog'n schu:
"das is ne Tudengraber sei Saufhaisel."

Neilich tot'r emol sei Leid klogn. Er wür ball arbeitslos - ar hätt schlachte Kundn in dann Borstendorf - alle tätn sich verbrenn lossn. Wenn'r dorchn Dorf hinner paar alte Leit haar läft, denkt'r in Stilln: "maahrt eich nar ball aus"!
Emol sogt'r: ar wullt sich vom Westen enn Spatn un enne Schaufel schickn lossn, un dann fürs Grob ausschaufeln Westgald verlang.
Aaner wollt itze mol 20 Mark beim Schwoj Lothar aazahln, weil'r Schnuppen hot. Er kaa doch nie wissen, wie heitzetog su e Schnuppen ausgieht!

Wie'r wieder emol etliche getrunken hot sog t'r:
"de Leit denken immer wunner wie tief se in de Ard neikomme. Ha wenn die wißt'n! Dann huchn Holzrahm uben drauf un dann ausgeschaufeltn Drack drumrim, un do de Mattn neihäng. De Leit getraue sich sowieso net dort nei ze guckn! Wenn dann dr Sarch neikimmt gieht dar bissl ausgeschaufelte Drack gerod su an dr Seit nei, un dr Sarch is gerode su e bissel mit Drack zugedeckt.
Wenn dann ne Wolfbauer senne Hühner offn Grob rümhar scharrn, muß mr aufpassn, daß die net ne Sarchdeckel zerkratsn."

Ober es schännste kimmt jetzt erscht.
Neilich war dr Schwoj Lothar aa e bissel aagekratzt aus dr Kneip gekomm un es war ne ganz schwummrich in Bauch. Un weil'r alles dorchenanner getrunkn hot, dot'r drhamm alles wieder rausspein! Aah sei neies Gebiß kom mit rausgeflugn.
Nu hom se doch jetzt beim Schwoj Lothar aa noch enn Hund. Su aane neie Promenadenmischung. Dar hot sich nu gelei über dann rausgespeiten Zeig haargemacht, un aa die neie Zähn mit zerkatscht, weil'r docht es wärn Knochn.
Nu muß dr Schwoj Lothar uhne Zähn im Dorf rümharlaafen. När zwää Eckzähn stiehe noch un do hom se dann armn Kerl aah noch gefoppt: ar kännt doch mit dann zwä Eckzähn bei dr Eisnbahn als Fahrkartenlocher gieh un sich e paar Mark drzu verdiene!

 

Horst Schreiter

zurück